Fakanofo 'o e Minisita ki he Potungaue Takimamata
Sekelitali Pule & Sekelitali Ki he Kapineti 'i hono foaki kia Hon. Dr. Viliami Uasike Latu 'a hono Tohi Fakanofo mei He'ene 'Afio
12 'Epeleli, 2024. Na'e fakahoko 'a e polokalama lotu fakafeta'i 'a e famili mo e kainga 'o Hon. Dr. Viliami Uasike Latu 'i Fasi-Mo e-Afi he houa efiafi 'o e 'aho Tu'apulelulu 11 'o 'Epeleli.
Ko e polokalama foki ko'eni na'e makatu'unga ia 'i he finangalo 'a 'Ene 'Afio, Tupou VI ke fakanofo ia ki he lakanga Minisita 'o e Potungaue Takimamata.
Ko e fakanofo eni hili ha fokotu’u atu mei he ‘Eiki Palēmia, Hon. Hu’akavameiliku, ‘o fakatatau ki he Kupu 51(2) ‘o e Konisitutone, ‘o Tonga.
Na’e kamata lau ‘a e fakanofo Minisita ko eni mei he ‘aho 28 Ma'asi, 2024.
Na'e lau 'a e tohi fakanofo mei He'ene 'Afio, 'e he Sekelitali Pule mo Sekelitali ki he Kapineti, Paula Ma'u pea me'a ai 'a e 'Eiki Palemia mo e kau Minisita 'o e Kapineti pehe ki he famili mo e kainga.
Ko Hon. Dr. Viliami Uasike Latu koe Minisita lolotonga ia ki he Potungaue Fefakatau'aki mo e Langa Fakalakalaka Faka'ikonomika pea 'oku toe tanaki atu ki ai mo e Potungaue Takimamata.
Ko e ongo Potungaue mahu'inga foki 'eni ki he langa fakalakalaka faka'ikonomika 'a e fonua.
