Fakamalōlō'i fakataimi Piveni Piukala mei he Fale Alea
Fakafofonga Fale Alea Tongatapu 7 Paula Piveni Piukala
21 Fepueli 2024. Kuo tu'utu'uni 'e he 'Eiki Sea 'o e Fale Alea Lord Fakafanua 'i he Fale Alea 'o Tonga 'i he 'aho Mōnite 20 'o Fepueli ke fakamalōlō'i fakataimi 'a Paula Piveni Piukala ka koe Fakfofonga ki he Fale Alea 'o e Vahenga Tongatapu 7 'i ha 'aho 'e 7 koe anga ta'efaka'apa'apa.
Ko hono fakamalōlō'i fakataimi ko 'eni 'o Piukala hili hano fokotu'u mai mei he Komiti Tu'uma'u ki he Ngaahi Totonu 'a e Fale Alea (Priviledge Committee) 'oku mo'oni 'a e launga na'e fakahoko 'e he 'Eiki Palēmia Hon. Hu'akavameiliku 'i he 'aho 7 'o 'Aokosi 2023 na'e anga ta'e faka'apa'apa 'a e Fakafofonga kiate ia lolotonga 'a e feme'a'aki 'a e Fale Alea.
Ko e lāunga foki 'eni fekau'aki mo e lea 'a e Fakafofonga ki he Palemia mo 'ene kaikaila 'o pehe "koe pa'anga pe ho'o kui teke fa'iteliha kiai" lolotonga 'a e feme'a'aki 'a e Fale pea na'e fakamafola 'eni 'i he ngalu'ea mo e ope i he 'aho 7 'o 'Aokosi 'o e ta'u kuo 'osi.
'Oku mahino foki mei he Lipooti 'a e Komiti na'a nau vakai'i 'a e 'ātakai 'o e launga ko'eni 'o kau ai hano tā mo hono toe siofi hono hiki lea mo e 'ata 'o e feme'a'aki pea fakakaukau'i mo e ngaahi puipuitu'a 'o e lea mo e fakafōtunga pehe ki he ngaahi māfihunga 'a e sino mo e le'olahi 'o e lea na'e fakahoko lolotonga 'a e feme'a'aki.
Na'e aofangatuku 'e he Komiti 'oku malava 'o fakamo'oni'i 'a e launga pea na'e fokotu'u atu ai pe ki he Fale Alea ke tautea 'a e Fakafofonga fakatatau mo e Kupu 108 (1) mo e Kupu 3 pea na'e fakahoko 'a e tautea fakatatau ki he Kupu 49 'o e Ngaahi Tu'utu'uni 'a e Fale Alea.
Na'e loto 'a e toko 19 ke tali 'a e Lipooti ko'eni mei he Komiti Tu'uma'u ki he Ngaahi Totonu 'a e Fale Alea fakataha mo hono tautea 'o e Fakafofonga Tongatapu 7 pea na'e 'ikai ha taha 'e fakahāloto 'oku ta'eloto ki he Lipooti 'a e Komiti.
'Oku matu'aki mahu'inga foki 'a hono ngāue'aki 'a e Ngaahi Tu'utu'uni ki he Ngāue 'a e Fale Alea kene malu'i 'a e ngeia 'o e Fale pehe ki hono kau memipa.
