'Ahia 'e he ‘alotamaki fakatalopiki ‘e 11 potu tahi Pasifikí faha’i ta’u afā 2019/2020 Featured
Talekita Le’ole’o ‘a e Va’a Fakamatala ‘Ea ‘a Tongá Laitia Fifita
5 Mē, 2020. Na’e fe’unga mo e ‘alotamaki fakatalopiki ‘e 11 na’a ne ‘ahia ‘a e potu tahi ‘o e Pasifikí ‘i he faha’i ta’u afā 2019/2020. Ko e ‘alotamaki fakatalopiki ai ‘e ono na’a ne ‘ahia ‘a e potu tahi ‘o Tongá pea mei aí ko e ‘alotamaki fakatalopiki ‘e tolu na’e a’u hono mālohí ki he mālohi ‘o e saikoloné na’a ne uesia ‘a Tongá.
Ko e fakahā ‘eni ‘e he Talekita Le’ole’o ‘a e Va’a Fakamatala ‘Ea ‘a Tongá Laitia Fifita ki he Kōmiti Fakafonua ki he Ngaahi Me’a Fakatu’upaké ‘i he ho’atā ‘o e ‘aho ni, ‘i hono fakama’opo’opo ‘a e faka’osinga ‘o e faha’i ta’u afā 2019-2020 ‘a ia na’e ‘osi ‘i ‘Epeleli 30.
Fakatatau ki he fakamatala ‘a Laitiá ko e saikolone fakatalopiki ko ‘eni na’a ne uesia ‘a Tonga ni na’e kau ai ‘a e Saikolone Fakatalopiki ko Sarai Kalasi 2, Saikolone Fakatalopiki ko Tino Kalasi 3 pea mo e Matangi Malohi ko ia ko Halotí kalasi 5.
‘I he ngaahi saikolone fakatalopiki ko ‘ení kae tautefito kia Haloti ko e peseti ‘e 70 ‘o e ngaahi maumau na’e hoko aí na’e fakatupu ia ‘e he peau aake malohi (storm surge).
Na’a ne fakahā foki ko e toki a’usia ‘eni ‘e he fonuá ‘a e ngaahi uesia fo’ou ko ‘ení ‘a ia na’e a’u ai ‘a e ma’olunga ‘o e peau fakasunami ko ‘ení ki he mita ‘e 12.
“Neongo na’e lahi ‘a e ngaahi maumaú ka na’e ‘ikai ha mo’ui ‘e mole.”
Taimi tatau na’e fakahā ‘e he Pule Ngāue ‘a e Potungāue MEIDECC Paula Ma’u, ‘oku mahino mai ai ‘a e sai ‘a e tu’unga mateuteu na’e fakahoko ‘e he kakai ‘o e fonuá, kimu’a pea tō mai ‘a e saikoloné, lolotonga ‘a e saikoloné pea mo e ngaahi ngāue tokoni fakavavevave na’e fakahoko hili ‘a e matangí.
Na’e fakamamafa’i foki ‘a e mahu’inga ‘o e mateuteu ki he faha’i ta’u afā hokó.
Fakatatau kia Laitia kuo ‘osi fakapapau’i mei he Va’a Fakamatala ‘Ea ‘a Tongá ko ‘ene ‘osi ‘eni ‘a e matangí ki he faha’ita’u afā 2019/2020. Ko e Fakamatala Saikolone Fakatalopiki (Tropical Cyclone Outlook) kotoa ‘e nima na’e tuku mai ‘e he Va’a Fakamatala ‘Ea ‘a Tongá ‘i he mahina ‘e ua kotoa pe ‘i he faha’i ta’u afā 2019/2020. Ko e Fakamatala Saikolone Fakatalopiki hokó ‘e toki tuku mai ia ‘i Nōvema ‘o e ta’u ni.
