Tu'uta fuofua puna 'a e Real Tonga ki he Mala'evakapuna Nausori 'i Fiji Featured
Ko e pule 'o e Kautaha Rosie Travel, Eroni Puamau, Tevita Va'inga Palu Sea 'o e Kautaha Real Tonga, Faifekau Tevita Palu CEO Kautaha Real Tonga mo e Pule 'o e Ngaahi Mala'evakapuna 'i Fisi mo e Custom Services Joe Gray 'i he tu'uta 'a e fuofua puna 'a e Kautaha Real Tonga ki he mala'evakapuna Nausori
1 'Aokosi, 2019. Na'e tu'uta 'i he mala'evakapuna Nausori 'i Suva 'i he pongipongi Monite 'o e uike ni 29 'o Siulai 2019 'a e fuofua puna 'a e kautaha Vakapuna Real Tonga ki he mala'evakapuna Nausori 'i Fiji.
Ko e puna ko'eni na'e fakahoko ia 'i he vakapuna Saab 340B 'a e kautaha pea na'e folaui ai 'a e kau fakaafe mahu'inga (VIPs) 'e toko 12 mo e kau pasese 'e toko 12 kehe.
Ko e fepuna'aki ko'eni 'oku fakahoko 'i he pongipongi Monite kotoa pea fakatatau ki he fakamatala 'a e CEO 'o e kautaha Faifekau Tevita Palu na'a ne pehe ai 'oku fakafiefia 'a e fuofua puna ko'eni he 'oku 'ikai koe folau ki Nadi 'o hange koe angamaheni ka 'oku hangatonu pe ki Suva.
'I he fakamatala 'a Faifekau Palu na'a ne pehe ai 'oku anga maheni 'aki he folau ki Suva 'oku 'aho 'e 1 kakato 'a ia koe folau ki Nadi pea toki puna mei ai ki Suva ka koe fepuna'aki fo'ou ko'eni 'oku houa pe 'e 1 miniti 'e 40 kuo tu'uta 'i Suva.
Na'e toe pehe foki 'e faifekau Palu ko hono kamata 'eni 'a e fepuna'aki 'a ia na'e misi kiai 'a e kautaha 'i he kuohili ka 'oku 'i ai mo e fakakaukau na'a malava ke hiki hake ke puna tu'o ua he uike.
'I ha fakamatala 'a e pule 'o e Kautaha Rosie Travel, Eroni Puamau 'i Suva na'a ne pehe ai koe 'epoki fo'ou 'eni 'a ia 'oku malava kene langa ha fengaue'aki 'i he vaha'a 'o Tonga mo Fiji 'o 'ikai ngata he ola lelei fakapisinisi ki he ongo tafa'aki ka tene toe langa'i hake foki 'a e takimamata mo e ngaahi faingamalie kehe pe.
Ko e fepuna'aki foki ko'eni 'oku ne 'oange 'a e faingamalie kiate kinautolu 'oku folau kenau fili foki pea toe kaunga lelei ki he fakasi'isi'i 'o e taimi folau pehe foki ki he totongi folau.
