Kamata fepuna’aki ‘a e Real Tonga ‘i he vaha’a ‘o Tonga mo Fisi Featured
3 Siulai, 2019. ‘Oku ‘amanaki ke kamata ‘i he ‘aho 29 ‘o e mahina ko Siulai ‘a e fepuna’aki fakavaha’a Pule’anga ‘i he vaha’a ‘o Tonga mo Fisi ‘a e Kautaha Vakapuna Real Tonga.
Ko e fepuna’aki ko’eni ‘e kamata ‘i he vaha’a ‘o e mala’evakapuna Fua’amotu mo e mala’evakapuna Nausori ‘i he ‘aho Monite kotoa pea ‘e toki malava mei ai ke fakalahi ‘i he’ene tu’u ki he kaha’u.
‘I he fakamatala ‘a e pule lahi ‘o e Kautaha Real Tonga Tevita Palu koe ‘uluaki Kautaha vakapuna Tonga ‘eni ke fepuna’aki mo Suva.
Na’e toe pehe foki ‘e Tevita Palu koe makamaile ‘eni ki he kautaha pea koe misi kuo hoko ‘o mo’oni.
‘I he hoko atu ‘a Palu na’a ne pehe ai ‘e hoko ‘a e puna ki Suva kene ‘oange ha toe fili ki he kau folau ‘o tatau ‘i he totongi mo e sevesi pea ‘oku fakafiefia lahi ‘eni ki he kakai ‘oku fefolau’aki.
‘Oku lolotonga fakahoko foki ‘e he Kautah Real Tonga ‘a e fepuna’aki ‘i he vaha’a ‘o Vava’u mo Apia ‘i Ha’amoa.
Ko e vakapuna SAAB 340 ‘oku ‘amanaki ke ngaue’aki ki he fepunaaki ko’eni mo Suva ‘i Fisi pea ‘oku malava kene uta ‘a e kau pasese ‘e toko 25.
Kuo ‘osi fakamo’oni foki ‘a e Kautaha Real Tonga ‘i he aleapau mo e Nauru Airlines ke fakahoko ha fepuna’aki ‘i he vaha’a ‘o Tonga mo Nu’usila pea ke kamata ‘i Novema ‘o e ta’u ni..
