Ikuna 'e he Tala 'enau fuofua va'inga kualifai ki he Ipu 'a Mamani Featured
'Eiki Palemia mo e Timi Netipolo 'a e Tala 'i Suva
20 Siulai 2022. Kuo ikuna 'e timi netipolo fakafonua 'a Tonga 'a ia 'oku 'iloa ko e Tala 'ene fuofua va'inga kualifai ki hano sea ki he fe'auhi Ipu 'a Mamani 'i he Netipolo 'a ia 'oku 'amanaki ke fakahoko 'i he ta'u 2023 ki Saute 'Afilika.
Ko hono ikuna 'eni 'e he Tala 'a e timi 'a Ha'amoa 'aki 'a e kai ko e 69-52 'i he uike ni ia 'i Suva Fiji 'i ha tau na'e fepolepolei.
Neongo na'e fefeka 'a e kamata 'a Ha'amoa ka na'e fakama'opo'opo lelei pe 'a e va'inga 'a e Tala pea toe malohi ange ki he faka'osinga 'o nau a'usia ai 'a e ikuna ko'eni.
'Oku 'amanaki ke fetaulaki 'a e Tala pea mo e timi 'a Fiji 'i he 'aho 20 Siulai, PNG 'i he 'aho 21 Siulai pea Cook Islands leva 'i he 'aho 22 'o Siulai ai pe pea 'e toki mahino mei ai 'a e tu'unga 'e a'u kiai neongo koe matu'aki kamata lelei 'eni.
Ko e Tala foki 'a e hau 'i he fe'auhi Pacific Australia Netball Series 2022, hili ia ha'ane ikuna 'a Fiji 'i he fainolo 'o e fe'auhi ni 'i Ma'asi 'o e ta'u ni.
