Foaki Aositelelia tokoni $1.9 miliona AUD ki he ma’u’anga vai ‘a e ngaahi kolo Featured
15 Sune, 2020. Na’e foaki ‘e ‘Aositelelia ha AUD$1.9 miliona ke tokoni ki he ma’u’anga vai ‘a e ngaahi kolo, hiki’i hake ‘a e tu’unga haisini ‘i he anga e nofo, mo e fakalakalaka ‘i he ngoue ‘o fakataumu’a kotoa eni ke toe maluange ‘a e kakai ‘o e fonua ni mei he ngaahi nunu’a ‘o e COVID19.
Na’e fakafou hono foaki ‘a e tokoni pa’anga ko eni ‘i he ngaahi kautaha ta’efakapule’anga pe NGOs kau ai ‘a e MORDI Tonga Trust, Live and Learn Tonga, mo e Caritas kenau takimu’a hono tokanga’i mo fakahoko ‘a e ngaue ki he malu ‘a e komiuniti mei he COVID19 mo e tokoni ki he uesia hiliange ‘a e Saikolone Fakatalopiki ko Haloti.
Na’e kau ‘i he ngaahi ngaue ne fakapa’anga’aki ‘a e tokoni ko eni hono fokotu’u ‘a e ngaahi tangike vai ‘i he ngaahi kolo mo e ngaahi ‘apiako, fakahoko mo e polokalama ako ki he ma’a mo e haisini, mo e tokoni ki he fakalakalaka ‘a e ngoue ki he ma’u’anga mo’ui ‘a e ngaahi famili mo e talatalaifale ko e fakalotolahi ki he ni’ihi ‘oku uesia mei he fakatamaki ni.
Na’e fakaha ‘e he Talafekau Lahi ‘a ‘Aositelelia ki Tonga ni, HE Mr Adrian Morriso, “‘Oku tukupa ‘a ‘Aositelelia ke poupou ke toe leleiange ‘a e tu’unga malu ‘a Tonga ni mei he COVID19 pehe ki he ngaahi uesia i he kaha’u mei ha fakatamaki fakaenatula hange ko e saikolone.
‘Oku mau fiefia foki ke tokoni’i ‘a e leleitaha ‘i he ngaue ‘a e ngaahi kautaha fakalotofonua ke nau lava matu’uaki ‘a e ngaahi faingata’a ‘i he kaha’u, kau ai hono langa ha ma’u’anga vai ‘oku ma’a mo tolonga, taukave’i ‘a e mo’uilelei mo e ‘ilo ki he ngoue.”
‘Oku poupou mo tokoni’i ‘a e ngaahi Kautaha ta’efakapule’anga koeni ‘e he hoangaue ‘a ‘Aositelelia ko e CARE Australia, Live and Learn Australia, mo e Church Agencies Network Disaster Operations (CAN DO)/Caritas Australia.
Ko e tanaki eni ki he AUD $8miliona na’e ‘osi foaki ko e tokoni ki he Potungaue Mo’ui mo e Potungaue Pa’anga ke fakaasi’isi’i ‘a e ngaahi uesia ‘o e COVID19 ‘i Tonga ni.
