Fakapapau'i 'oku hao pe 'a Tonga mei he Kolonavailasi Featured
13 Ma'asi, 2020. Kuo fakapapau'i mei he Potungaue Mo'ui kuo mahino pea konifeemi mei he sivi hono ua na'e fakahoko 'i Nu'usila 'oku hao pe 'a e ki'i fefine na'e mahamahalo'i 'oku ne fokoutua 'i he Kolonavailasi 'a ia na'e tauhi 'i he Falemahaki Vaiola.
Ko e ongoongo fakafiefia ia kihe fonua he na'e kamata ke 'asi mai 'a e tailiili 'a e kakai 'o e fonua ki he mahaki pipihi mo fakalilifu ko'eni 'a ia kuo talaki fakamamani lahi 'e he Kautaha Mo'ui 'a Mamani (WHO) ko e mahaki faka'auha pea fakahingoa ko e Covid-19.
'I he taimi tatau foki 'oku kei tapou pe 'a e Potungaue Mo'ui ki he kakai 'o e fonua kenau faka'ehi'ehi pea kiate kinautolu hotau kainga Tonga 'oku 'i Tu'apule'anga ke 'oua tenau folau mai ki Tonga ni kapau 'oku nau ongo'i 'oku nau fokoutua he mahaki fakalilifu mo mafola ngofua ko'eni.
'Oki 'ikai toe veiveiua foki 'oku kei tu'u lavea ngofua pe 'a e fonua ki he mahaki ni pea 'oku mahu'inga ke tau mateuteu he taimi kotoa.
