Ngaue popula ki he mate ongo matu'a koe hu mai e faito'o konatapu
12 Sune 2025. Kuo tautea 'e he Fakamaau'anga Lahi 'a e ongomatu'a koe hu ta'efakalao mai 'a e faito'o konatapu 'ai 'oku 'iloa koe 'aisi (methphetamine)
Ko e tu'utu'uni 'eni 'i he Fakamaau'anga Lahi 'i Nuku'alofa 'i he ‘aho 6 'o Sune 2025 ke ngaue popula ki he mate 'a Fine Tevita Fifita mo Vaivevea Mafi ‘o Fo'ui ki hono hu mai 'a e faito'o konatapu ko'eni mei 'Amelika.
Na’e puke ‘a e ongomatu’a ‘i he fale tuku’anga uta ‘a e kautaha S.F Oceania ‘i Ma’ufanga he ‘aho 27 ‘Epeleli 2023 hili ai hono ma'u 'e he kau 'ofisa kasitomu mo e kau polisi ha 'aisi fe'unga hono lahi mo e kalami 'e 1157.4 na'e fa'o mai 'i he puha na'a na oo atu ke tukuange mai.
Ko e ma'u 'eni 'o e faoto'o konatapu na'e fa'o 'i ha ngaahi kane 'omo 'i ha puha nae fakatu'asila mai kia Mafi Vaivevea mei he tokotaha ko Lolani Finau 'a ia 'oku nofo Amelika.
Ko e uta ko'eni na'e fakatu'asila mai kia Mafi Vaivevea 'a ia koe uaifi ia 'o Fine Tevita Fifita hili hano kole 'e Fine ke liliu ki he hingoa 'o Mafi he 'oku te'eki ke 'omai tu'otaha ha uta kiate ia.
Na'e mahino mei he hopo ni 'oku fengaue'aki 'a e ongo faka'iloa mo Lolani Finau 'a ia 'oku na to ngoue 'o uta ki 'Amelika kia Lolani.
Na'e mahino 'i he hopo ni 'a hono malava lelei 'e he Talatalaaki 'o fakamo'oni'i 'ikai ha toe veiveiua na'e mauamau'i 'e he ongo matu'a ni 'a e lao ki he hu mai 'o e faito'o konatapu (Illicit Drugs Control Act) 'i haana hu mai ha faito'o konatapu Class A 'i he 'ilo'ilopau 'oku tapu.
Na'e kole ai pe 'ehe Talatalaaki ke hilifaki ai pe 'a e tautea fakatatau mo e tu'utu'uni 'a e lao pea mo e lahi 'o e faito'o konatapu na'e hu mai pea fakahoko ai pe 'a e tautea 'e he Fakamaau Lahi.
Na'e fakafofonga pe 'e he ongo matu'a kinaua pea ko Semisi Lutui ma'ae Kalauni.
