Mo‘oni e Fakailifia Kolonavailasí, Pē ko e Faka-tu‘unga‘a ‘a e Mītiá U.S.A.? Featured
Mo‘oni e Fakailifia Kolonavailasí, Pē ko e Faka-tu‘unga‘a ‘a e Mītiá U.S.A.?
Liliu Lea Tonga: Sione Ake Mokofisi
‘I he fakafuofua ‘a Dr. Drew Pinsky (toketā faito‘o mahaki faka-pōpula – addiction medicine specialist) mei he ngaahi lepooti ‘a e mītia ‘Ameliká, kau ki he mafola ‘a e kolonavailasí ‘o ne fakamatala ‘i he polokalama “The Ingram Angle” (Fox News): “Ko e aka ‘o e palopalema faka-lotofonuá (U.S.) ko e faka-tu‘unga‘a kamata ‘e he ngaahi kautaha mītiá.
“Ko hono mo‘oní, ko e palopalema lahí ko e hoko ‘a e fakailifiá ni, ka ‘oku ‘ikai ko e vailasí he ‘oku te‘eki ai mafola tavale ‘i ‘Ameliká ni ‘o hangē ko Siainá. Na‘á ku lea ‘aki eni uike ‘e ono kuo ‘osí, polokalama letiō ‘Dr. Drew After Dark,’” fakamatala ‘a Dr. Drew.
Ko e toko ono (6) pē kuo mālōlō mei he kolonavailasí; ka e toko 18,000 ‘a e mate mei he fulū. Ko e hā ‘oku ‘ikai tala ai ki he kakaí kenau ‘ō ‘o huhu ta‘ofi fulū (flu vaccine)?” Dr. Drew.
Ta‘e ‘Aonga Tui Pūlou Fakapuli
“Ko e faka-tu‘unga‘a eni na‘e mafola mei he ngāue ‘a e mītiá,” hokoatu fakamatala ‘a Dr. Drew. ‘I he ‘ene laú, ko e kakai ‘oku nau tui holo ha pūlou fakapuli ke ta‘ofi ‘a e vailasí ‘oku nau kau ‘i he “anga faka-tu‘unga‘a” (panic) ka e ‘ikai ke nau mateuteu ke ta‘ofi ‘a e vailasí.
Ko e pūlou fakapulí ‘oku tui ia ‘e ha tokotaha ‘oku pihia ‘i he mahakí, ke ta‘ofi ‘a e mafola ‘a e siemú. ‘Oku nau tui ‘a e pūloú telia na‘a nau tale pe tenau mafatua. Ko e teuteu faka-haisini ia ke ta‘ota‘ofi ‘a e mahakí.
Ko e teuteu pau ke mata‘ofi ‘a e vailasí ko e fanofano ma‘upē ‘i he ‘osi hono faka‘aonga‘i ‘o ha falemālōlō, mo e teuteu ki he ma‘u me‘atokoní. Tānaki ki ai mo e ‘a‘ahi ki he toketā ‘i ha‘o ongo‘i puke tautefito ki he mofí, pea ongo‘i vaivaiá, mo e ninimó.
Teuteu ‘a e Pule‘angá ‘Ameliká
Na‘e ‘osi fakangatangata ‘e Palesiteni Trump ‘i Sānuali ‘a e faka-tū‘utamai ‘a e kau pāsese mei he ngaahi fonua kuo mafola ki ai ‘a e kolonavailasí ‘i Sānuali. Pea na‘e malanga‘i ‘e Trump ‘i he efiafi Mōnité ‘o ne tukuaki‘i ‘a e Paati Temokalatí tokua kuo nau faka-politikale‘i ‘a e COVID-19 (kolonavailasí).
“Na‘a nau tala kuó u lau lanu ‘i hono faka-tapui ‘a e tū‘utamai mei he ngaahi fonua ‘e ni‘ihi. Kuo tāpuni mo e ngaahi halanga humai mei he ngaahi fonua ‘e ni‘ihi; pea kuolonitini ‘a e ngaahi vaka ‘oku tū‘utamai ki hotau ngaahi taulangá,” fakamatala ia ‘a Trump.
“Pea ko e founga fefeka na‘a mau faka‘aonga‘i ‘i Sanualí ‘oku malu 100%,” hokoatu ‘a Trump. Peá ne palōmesi ai ‘e vavemai ‘a e maau ‘a e faito‘o huhu ta‘ofi (vaccine) ki he kolonavailasí. “Kuo mateuteu ‘a e ngaahi falemahakí, ngaahi kilīnikí, mo e ngaahi ‘ōfisi ‘o e kau toketā ke sivi ‘a e tokotaha kotoa ‘oku ongo‘i puke.”
Ko e tokolahi kuo pihiá ‘i he COVID-19 ko e toko 60. Tokolahi ‘Amelika kuo pekiá, toko 6 – 10%. Ko e fakamatala ia mei he U.S. Centers for Disease Control and Prevention (CDC).
Fa‘utohi: Charles Creitz & Andrew O’Reilly (Mā‘asi 03, 2020) – Fox News.
