Lava Hono Pulusi ‘Isiu Makehe 2 he Filosofī Tā-Vā ‘oe ‘Iai Featured
5 Tisema, 2021. Kuo lava mo ‘auti mai ‘ae Īsiu Makahe 2 he Filosofī Tā-Vā ‘oe ‘Iai (Tā-Vā Time-Space Philosophy of Reality) ‘ehe kau sikola Tonga ‘ehe sēnolo Pacific Studies (PS) he BYU Hauai‘i ‘i Nōvema 2021.
‘Oku hingoa ‘ae tohi ni koe “‘Atamai-Loto, moe Faka‘ofo‘ofa-‘Aonga: Tongan Tā-Vā Time-Space Philosophy of Mind-Heart and Beauty-Utility.” ‘Oku tefito ‘ae tohi ni he ‘ilo moe poto tu‘ufonua tupu‘a fakataha moe faiva, tufunga, moe nimamea‘a ‘a Tonga.
Na‘e ētita fakaafe ‘ae tohi ni ‘e Pā‘utu ‘O Vava‘u Lahi, Adriana Māhanga Lear; Kolokesa Uafā Māhina-Tuai; Dr Sione Lavenita Vaka; mo Palōfesa Maui-TāVā-He-Ako Dr Tēvita O. Ka‘ili.
Kae ‘ētita fakafe ‘ae ‘Īsiu Makehe 1 (Tā-Vā [Time-Space] Theory of Reality) he PS na‘e ‘auti mai he 2017 ‘e Palōfesa Maui-TāVā-He-Ako; Palōfesa Hūfanga-He-Ako-Moe-Lotu Dr ‘Ōkusitino Māhina; mo Palōfesa Kula-He-Fonua Dr Ping-Ann Addo.
‘Oku fe‘unga kātoa ‘ae tohi ni moe ‘ēsei ‘e 10 na‘e vahevahe hono tufunga ‘ehe kau sikola Tonga ko Pā‘utu ‘O Vava‘u Lahi; Kolokesa Uafā Māhina-Tuai; Dr Vaka; Palōfesa Maui-TāVā-He-Ako; Manuesina ‘Ofakihautolo Māhina; Bruce Sione To‘a Moa; Tavakefai‘ana, Sēmisi Fetokai Kulīha‘apai Moahehengiovava‘ulahi Potauaine; mo Palōfesa Hūfanga-He-Ako-Moe-Lotu.
‘Oku lahi ‘ae ngaahi ‘ilo fo‘ou mo makehe na‘e ma‘u he kumi moe fekumi he toni ni.
Na‘e kehekehe ‘ae ngaahi kaveinga ‘oe ngaahi ‘ēsei takitaha koe 1. talakamata 2. sino, ‘ilo, moe ongo; 3. hoa (hoatatau/hoamālie moe hoakehekehe/hoatamaki); 4. sio fakaTonga ‘ae ‘aati fakaTonga; 5. loto, tu‘a, moe fale; 6. vaka, fale, moe kava; 7.
Siueli ‘oe Pasifiki (maa‘imoa ta‘anga hiva haka sani-mo-viki moe fetau ‘a Kuini Sālote); 8. Tuaikaepau (maa‘imoa ta‘anga hiva haka lakalaka fakamamahi ‘a Kuni Sālote); 9. Lofia, Koe Kumi Tu‘i (faiva ta‘anga hiva haka lakalaka ‘a Kaliopasi Fe‘iloakitau Kaho); moe 10. faiva lova‘a‘alo.
‘Oku fakaangaanga ke toe ‘auti mai ‘ae ‘Īsiu Makehe 3 he 2022-23 he mafola ‘ae filosofī tā-vā ‘i mamani he ngaahi mala‘ē mo ‘ene tu‘u kihe kaha‘u he kaveinga koe “Tā-Vā Time-Space Philosophy Across the Divides and Beyond.” ‘Oku ‘ētita makehe ‘eni ‘e Kolokesa; Tavakefai‘ana; Palōfesa Maui-TāVā-He-Ako; mo Palōfesa Hūfanga-He-Ako-Moe-Lotu.
