Kātoanga Matariki 2021 'ae Ha'a Tainui moe Kāinga Māori, 'Aotearoa Nu'usila Featured
Palōfesa Hūfanga-He-Ako-Moe-Lotu Dr 'Ōkusitino Māhina
13 July, 2021. Na'e fakaafe'i 'ehe Ministry of Foreign Affairs, Pacific Cooperation Foundation, moe Kātoanga Matariki 2021, 'a Palōfesa Hūfanga-He-Ako-Moe-Lotu Dr 'Ōkusitino Māhina mei he Lagi-Maama Academy & Consultancy moe Vava'u Academy for Critical Inquiry and Applied Research ke kau he lea he Kātoanga he vā 'o Tainui moe Moana 'Ōsēnia / 'Pasifiki' he Waikato-Tainui College for Research and Development, Tūrangawaewae Marae, Ngaruawahia, 'i Hamilton, he Falaite 9 - Sāpate 11 Siulai, 2021.
Na'e fakaafe'i 'a Palōfesa Hūfanga-He-Ako-Moe-Lotu ke lea fakatapau he vā pē vaha'a 'o Tainui mo Tonga, 'o tefito he kaveinga fakaMāori koe whanaungatanga, 'aia 'oku 'iloa koe fanaunga'anga he fakaTonga. 'Oku ngāue'aki 'eni koe heliaki kihe fanau'anga, tupu'anga, pununga, pē mohenga 'oe 'ilo moe poto, ongo moe loto, moe 'aonga moe ngāue, 'oku fo'ou mo makehe mo'oni fau, mo mā'uhinga mo 'aonga lahi atu fakaako mo fakangāue.
'Oku kamata kotoa 'eni hona vā mei he kuohili pē kuongamu'a kihe kaha'u pē kuongamui fakatoulōua he lotolotonga pē kuongaloto, 'aia 'oku fakatatau / fakafenāpasi tu'uma'u mo ta'etuku ai 'ae 'ilo moe poto 'ae fanga kui fakataha moe ngaahi 'ilo moe poto kuo toe tānaki mai he tā /tā moe wā / vā.
'Oku toe 'iloa 'ae Matariki he fakaMāori koe kamata 'enau Ta'u Fo'ou koe Mataliki he fakaTonga 'oku kamata 'enau Ta'u Fo'ou he māhina fakaTonga ko Lihamu'a, 'o toe 'iloa he faka'Ingilisi koe Peliatisi (Pleiades), 'aia koe pupunga fetu'u 'oku tu'u fakaholoholo fakalotolangi fakataha moe Kaniva (Milky Way).
Na'e mā'uhinga mo 'aonga 'ae pupunga Matariki pē Mataliki pē Peliatisi koe ma'unga 'ilo moe poto he faiva faifolau pē faiva toutaivaka, faiva toutaiika moe faiva fa'a he kuohili pē kuongamu'a (moe faiva ta'anga fakataha moe faiva lea moe tufunga lea). Na'e ngāue'aki 'eni 'ehe ua 'oe ngaahi vaka tupu'a koe waka Takitimu / Takitumu moe waka Tainui na'e folau mai ai 'ae kāinga Māori mei Fisi, Tonga, mo Ha'amoa 'o fou mai he 'Otumotu Kuki kihe 'Otumotu 'Aotearoa. 'Oku 'iloa 'ae ongo motu lalahi koe Te Waka 'a Maui moe Te Ika 'a Maui.
Na'e fokotu'u 'e Palōfesa Hūfanga-He-Ako-Moe-Lotu ha ngaahi faingamālie fakafekumi mo fakatotolo fakaako mo fakangāue he vā fakafonua 'a Tainui mo Tonga kihe kaha'u, 'o hangē koe:
(1) Tā / tā moe wā / vā koe waka / vaka 'oe me'a kotoa pē (kau ai 'ae 'ilo moe poto, ongo moe loto) he 'iai pē natula, 'atamai, moe fonua / sōsaieti moe founga kehekehe hono fokotu'utu'u 'ehe ngaahi fonua moe tala kehekehe.
(2) Whanaungatanga / fanaunga'anga koe fanau'anga / tupu'anga / pununga / mohenga 'ae ngaahi 'ilo moe poto moe ongo moe loto fo'ou.
(3) Matariki / mataliki / peliatisi koe ma'unga 'ilo moe poto, ongo moe loto, he faiva faifolau / faiva toutaivaka, faiva toutaiika, moe faiva fa'a, faiva talafetu'u / 'asitolōnomi, faiva talamatangi, moe faiva talapeau / talangalu.
(4) Mata / mata moe awa / ava 'o hange koe matakura/avakura/ matauri/avauri / matakula / avakula / mata'uli / ava'uli koe ma'unga 'ilo moe poto, ongo moe loto, he faiva talaivi fakataha moe faiva talafetu'u / 'asitalōnomi moe faiva vūsika.
(5) Iro / 'Ilo moe poto, ongo moe loto, 'oku fa'oaki he whenua / fonua mo talaki he reo / lea koe ma'unga iro / 'ilo moe poto, ongo moe loto.
(6) Whenua / fonua (pē honua, hanua, vanua, fanua, 'enua, moe fenua) koe ma'unga 'ilo moe poto, ongo moe loto, kihe 'kakai' moe ''ātakai' (society-ecology) 'o hangē koe feliuliuaki 'ae matangi (climate change) moe Kōveti-19.
(7) Hoa / hoa / soa (Ha'amoa), 'o kau ai 'a tukutuku / kupesi, koe ma'unga 'ilo moe poto, ongo moe loto, 'o hangē koe 'Ilo Fa'u (IF / Artificial Intelligence [AI]) (moe 'Ilo Ma'u [IM / Real Intelligence [RI], koe tānaki).
(8) Hawaiki / Pulotu koe motu'a whenua / fonua koe ma'unga 'ilo moe poto, ongo moe loto, kihe motu'a 'ilo moe poto tupu'a pē tu'ufonua hono fokotu'utu'u fakakohi pē fakalaini mo fakafelavai 'ae kuohili / kuongamu'a (past), lotolotonga / kuongaloto (present), moe kaha'u / kuongamui (future).
