Kole ‘e he Pule’anga Dr. ‘Aisake Eke ke tokoni hono teuteu patiseti 2017/18 Featured
Minisitā Pa’anga malōlō Dr. 'Aisake Valu Eke
13 Ma’asi, 2017. Kuo mahino mai 'e kole ‘e he Pule’anga ‘o fakafou ‘i he Minisitā Pa’anga fo’ou Tevita Lavemaau ‘a e Minisitā Pa’anga malōlō Dr. ‘Aisake Eke kene tokoni ki hono teuteu ‘o e patiseti ‘a e fonua ki he 2017/18.
Na’e fakamahino foki ‘a e kole ‘eni ‘e he ongoongo ‘a e Letiō Tonga ‘i he ‘aho ni pea fakamahino foki ‘oku haea ‘a Dr. Eke ko e fale’i makehe (special consultant) ki he fatongia ni.
Na'e toe me'a pe foki 'a e Minisitā Pa’anga fo'ou ia Tevita Lavemaau 'i he konifelenisi 'a e Palēmia mo e kau faiongoongo 'i he uike kuo'osi 'oku ne fiema'u 'a e Minisitā Pa’anga malōlō keme fai 'a e ngāue faka konisaluteni mei tu'a taua'atāina.
‘Oku mahino pe foki ko Dr. Eke na’a ne ‘i he fatongia pea ‘oku lahi ange ‘ene ‘ilo ki he tu’unga ‘oku ‘i ai ‘a e teuteu ki he patiseti 2017/18 ‘a e fonua mo 'ene tu'u lolotonga ki he kaha'u.
Ko e mahina ko Sune he ta’u kotoa ‘oku fakahoko ai ‘a e feme’a’aki ‘a e Fale Alea fekau’aki mo e patiseti ‘a e fonua pea ‘oku fiema’u foki ke maau ‘a e patiseti kimu’a pea toki fakahū ki he Fale Alea.
‘Oku te’eki foki ke mahino pe kuo tali ‘e Dr. Eke ‘a e fakaafe ko’eni pea ‘oku mahino pe foki ‘e ‘ikai faingofua ha faitu’utu’uni ki heni ‘a Dr. Eke he ko e toki lava ‘eni ‘a e uike ‘e 1 mei hono fakamalōlō’i ia ‘e he Palēmia mei he Kapineti mo e lakanga Minisitā Pa’anga.
