Tuku e toko 200 tupu ki tu'a mei he Tonga High School ko e tō he sivi ^Featured

‘Oku mahino mai foki ko’ene toki a’usia ‘eni ‘e he ‘apiako ni ha tu’unga pehe ni ‘i he hisitōlia hono fokotu’u.

Na’e ‘ohake foki ‘i he feme’a’aki ‘a e Fale Alea ‘i he uike ni ‘a e kaveinga ni pea na’e kole ai ‘e he Fakafofonga ‘o e Ongo Niua Sosefo Fe’ao Vakatā ka ko e Kolisi Tutuku ‘o e Ako’anga ni ke ‘oange ha faingamalie ‘o e fanau ako ko’eni.

‘I ha tali mei he ‘Eiki Minisitā Ako, na’a ne me’a ki he mahu’inga ke kei pukepuke ‘a e tu’unga ma’olunga ‘oku ‘i ai ‘a e ‘Apiako ni he ko e falemaama tupu’a ‘o e fonua.

Na’e fai foki ha fetu’utaki ki he Ako’anga ni pea na’e mahino mei ai koe fanau ko’eni ‘oku nau ‘i he levolo ‘o e ngaahi kalasi sivi faka-pule’anga pea koe tu’utu’uni ngāue pe foki ‘eni ‘a e Ako’anga ni ‘oku nau muimui kiai.

‘Oku ‘i he tu’unga ma’ulalo fakalukufua pe foki ‘a e ola o e ngaahi sivi fakapule’anga ‘i he fonua pea ‘oku ‘i ai foki ‘ene felave’i mei he ngaahi feliuliuaki ki he sisitemi ako ‘a e fonua ‘a ia ‘oku fakahoko mei eh Potungāue Ako.