Tuku ki tu'a 'a e Minisita Polisi mo e Sea Komiti kakato he 'aho 'e 5
5 'Aokosi, 2025. Kuo tu'utu'uni 'e he 'Eiki Sea 'o e Fale Alea Lord Fakafanua ke tuku fakataimi ki tu'a 'a e Minisita Polisi Hon. Paula Piveni Piukala pehe ki he Sea Komiti Kakato 'a e Fale Alea Lord Tu'ilakepa 'i ha 'aho 'e 5.
Ko e tu'utu'uni 'eni makatu'unga 'i he fe'ohifaki 'a e ongo memipa ni lolotonga 'a hono talanga'i 'a e taha 'o e ngaahi Lao Fakaangaanga 'a e Fale Alea 'o Tonga.
Fakatatau ki he fakamatala tuku mai mei he Fale Alea 'o Tonga ko hono tuku 'o e ongo memipa ni ki tu'a 'e fe'unga mo e 'aho 'e 5 ko 'ena maumau'i 'a e tu'unga molumalu mo e ngeia 'o e Fale Alea 'o Tonga.
Na'e kamata lau ai pe 'a e tautea ko'eni mei 'aneafi 'aho 4 'o 'Aokosi 2025 pea koe konga pe 'eni 'a e feinga 'a e Fale Alea ke malu'i hono ongoongo.
