Puke kau Polisi Naulu Faiongoongo ‘a e Televisone Nu’usila Barbara Dreaver Featured
Barbara Dreaver hili hono tukuange 'e he kau Polisi Naulu
5 Sepitema, 2018. Na’e puke ‘e he kau polisi Naulu ‘a e faiongoongo ki he Pasifiki ‘a e Televisone ‘Uluaki ‘a Nu’usila (TVNZ) koe fefine ko Barbara Dreaver ‘i Naulu lolotonga ‘ia ‘oku fai atu kiai ‘a e fakataha ‘a e kau taki ‘o e Pasifiki.
‘Oku pehe ‘e he fakamatala ‘a e Letio Nu’usila na’e puke ‘a Dreaver lolotonga ia ‘ene feinga ke faka’eke’eke ‘a e taha ‘o e kau kumi hufanga ‘i he kemi Kumihufanga’anga ‘a ‘Aositelelia ‘oku tu’u ‘i Naulu.
Na’e puke foki ‘a Dreaver ‘aneafi ‘o iku motuhia ai ‘a ‘ene ‘initaviu na’e fakahoko pea na’e tauhi taimi nounou pe ia ‘e he kau polisi Nauru ‘o faka’eke’eke.
‘Oku pehe foki ‘e he ongoongo ‘a e Letio Nu’usila ia ‘oku nau ma’u ha fakamatala na’e ‘ikai ke puke ‘a Dreaver ia ka na’a ne loto pe ia ke ‘alu mo e kau polisi Nauru ke tali ‘enau ngaahi fehu’i pea na’e fakafe’ao pe ia ‘ehe tokotaha mei he Potungaue ki Muli ‘a Naulu.
Kuo tukuange mai foki ‘a Dreaver ia hili hano tauhi taimi nounou pe ‘e he kau polisi Naulu ka ‘oku hoko heni ‘a e hoha’a lahi ‘a e kau taki faka-politikale ‘a Nu’usila ki he tu’unga tau’ataina ‘a e ongoongo he koe konga mahu’inga ia ‘o e temokalati.
Na’e ‘oatu ai ‘a e fakatokanga mamafa mei he taki ‘o e fa’ahi faka-politikale koe ACT ‘a Nu’usila ki Naulu ‘e malava pe ke to’o ‘a e lau miliona ‘o e tokoni ‘a Nu’usila ki Naulu kapau tenau kei hokohoko atu pe hono fakafe’atungia’i ‘a e tau’ataina ‘a e ongoongo.
‘Oku fe’unga foki moe pa’anga ‘e 7 miliona ‘Amelika ‘a tokoni ‘a Nu’usila ki Naulu ‘i he ta’u ‘e 3 ka hoko mai.
Na’e pehe ‘e Palemia Nu’usila Jacinda Arden ‘e fai ha’ane fakatalanoa ki he Pule’anga Naulu ‘i ha’ane a’u atu ki Naulu fekau’aki mo e me’a ni.
Kuo ‘omai foki mo e fakatoakanga ia mei he Pule’anga Naulu o fakamahino mai ‘oku ‘ikai kenau fakafe’atungia’i ‘a e tau’ataina ‘a e ongoongo pea ko Naulu koe fonua tau’ataina pea ‘oku ‘i ai ‘ene totonu ke pule’i lelei ‘a e tu’unga ‘oku ‘i ai a e kau faiongoongo ‘o fakatatau mo e lao.
Na’e toe fakamahinio mei he Pule’anga Naulu ‘oku totonu ke muimui ‘a e kau faiongoongo muli ki he ngaahi tu’utu’uni ngaue ‘a honau fonua kae faingofua ‘a e ngaue.
‘Oku fakaanga’i lahi foki ‘a e Puleanga Naulu ki he’enau fakangatangata ‘a e tau’ataina ki hono fakamafola atu ‘a e fakataha ‘a e kau taki ‘o e Pasifiki.
‘Oku ikai foki ke tali ‘e Naulu ‘a e kautaha ongoongo ‘Aositelelia koe ABC kenau tu’uta ange ki he fakataha ko’eni ‘a e kau taki ‘o e Pasifiki hili ia ha’anau feto’aki ‘i he me’a fakaongongo fekau’aki mo e kau kumi hufanga.
