Liliu Mafai Pule: Vave mo e Māmālie ^Featured

Koe Liliu koe tefito’i natula ia ‘oe maama ko eni. ‘Oku Liliu e me’a kotoa: vaveange pea lalahiange ni’ihi ‘ihe ni’ihi, tatau ai pe ia pe ‘oku tau loto pe ta’eloto kiai.

‘Oku tau monū’ia he ‘oku ‘iai e ngaahi me’a ‘oku tau pule kihe ‘enau Liliu, hange’ koe fakangata ‘oe mo’ui ‘a ha ki’i lo (ant) ‘oku si’i totolo hake ‘i hoto nima: momosi ke mate pe tafi’i pe tuku pe ke hoko atu ‘ene fononga, koe me’a pe ia ‘a’ata.

Koe Liliu Mafai Pule ‘oku hoko ia ‘ihe vaha’a ‘oe Pule pea moe Kakai pea koe taha ia e ngaahi me’a ‘oku tau pule pe kiai. ‘Oku tau teke ‘ihe ‘e tau loto kiai pea tau malōlō ‘o kapau kuo tau pehe’ kuo fe’unga. ‘Oku ‘ikai ke ‘iai ha fo’i tu’unga ia ‘oku pau ke tau a’u ki ai. ‘Oku fai’aki pe ‘e tau ‘ilo mo ho tau loto.

‘Oku tau fakakaukau ki he Liliu ‘o kapau ‘oku ‘ikai ke tau fiemalie ki he me’a ‘oku lolotonga hoko pe ‘oku tau misi ki ha me’a leleiange ‘e hoko mai ‘o kapau te tau Liliu.

Koe lelei ‘oku tau fakataumu’a kiai koe lelei fakalukufua ma’a e Fonua. ‘Oku ‘ikai koe lelei pe ma’aha ni’ihi ka koe lelei ‘oku fakakatoa. Koia ‘oku pau ai ke tau sio kihe ongo tafa’aki ‘o vakai’i ‘ae me’a tena fakatou fiemalie kiai, Pule moe Kakai.

Koe Liliu ko ‘etau hiki mei he tu’u’anga ‘oku tau lolotonga ‘iai ki ha tu’u’anga fo’ou.

‘Oku hange’ ko ha sitepu, ‘ote kaka ki ‘olunga ‘o tatau pe mo ha Liliu ‘oku hifo ki lalo. Kaikehe, ko’ete fetongi sitepu ‘oku te hiki ki he levolo fo’ou pea ‘oku muimui mai ai ‘a e polopalema fo’ou.

Ma’olunga ange Liliu koe lahiange ia ‘oe polopalema ‘oku ‘ikai ha’atau alāanga moia pea faingata’a ke vete pea iku ‘one kūmoa kitautolu. Koe Liliu fakafe’unga pe ‘e hoko mai e polopalema ‘oku tau ala maheni pe moia pea ‘e faingofua pe ke tau ‘ilo hono faito’o.

Koe Liliu Vave koe kaka he sitepu ma’olunga ‘ihe vaha’a taimi nounou pea ‘e ala hoko ai e fa’ahinga polopalema ‘oku ‘ikai ke tau alāanga moia ‘o hange’ koia na’e hoko ‘ihe ta’u 2006 ‘aia na’e tutu ai a Nuku’alofa ni.

‘Oku ou manavasi’i ‘aupito he koe me’a tatau pe ‘oku hoko ‘ihe ta’u ni ‘ae feinga ke fakavave e liliu pea neongo na’aku ma’u faingamalie keu fai e fakamatala koeni mei he OBN ‘ihe 2006 ka na’e ‘ikai hano ivi kene ta’ofi e ‘oho mai ‘a

e polopalema ne hoko ‘o vela ai ho tau Kolomu’a.

Koe mafai koe me’angāue pe ‘o hange’ pe ha me’alele, kuopau kete ako kete lava ‘o faka’uli mo mapule’i ‘ae loli pickup pea te toki ala kihe loli taulani he ka ‘ikai tete iku hua’i ‘ete uta ‘iha feitu’u ‘oku ‘ikai fiema’u ke fakahifo ai.

Koia ‘oku ‘ikai ha ‘uhinga ke tau to’o konga lalahi he ‘oku fiema’u ke tau ako ki hono ngāue’aki pea koe taha ia e ‘uhinga ‘oku mahu’inga ai ke tau Liliu fakakongokonga iiki.

‘Oku faingata’a ke tau ako ke ngāue’aki ha mafai ‘oku konga lalahi ka ‘oku faingofuaange ke momoiki pea tau toki kaka mei ai.

Kaikehe, ‘oku ou tui koe me’a kuo tau ‘inasi ai kuo fe’unga ‘anoa pea ‘oku ‘ikai ‘uhinga kia teau ’ae kei taukave ‘ae kakai ‘e ni’ihi kenau toe vavae mai e mafai.