Fakahiki’i ‘a Laumanu Petelo mo Viola Ulakai mei he va’a ongoongo ‘a e Letio Tonga ^Featured

‘I hano lipooti ‘e he ongoongo ‘a e Letiō Nu’usila na’e fakamahino mei ai koe konga ‘eni ‘o e fokotu’utu’u fo’ou ‘a e Komisoni Fakamafolalea ‘a Tonga ‘i he malumalu ‘o e tu’utu’uni ‘a e Sea fo’ou ‘o e Poate Tu’i Uata.

‘Oku ‘ikai foki ke hā lelei ‘a e fehikitaki ko’eni ki he tokolahi ‘o e kakai ‘o e fonua he koe tokoua ko’eni ‘oku na taukei taha ‘i he tafa’aki ongoongo ‘a e Letiō mo e Televīsone Tonga pea kuo lauita’u ‘a ‘ena fai fatongia mai ‘i he tafa’aki ko’eni.

‘Ikai ngata ai ka ‘oku manakoa ‘a e fakahoko fatongia ‘a e ongo fafine ni mo ‘ena ngaahi polokalama ‘o kau ai ‘ena tukuange totonu mai ‘a e ngaahi ongoongo ‘oku kaunga tonu ki he fakahoko fatongia ‘a e Pule’anga mo e anga ‘a hono tataki ‘o e kakai ‘o e fonua ‘e he kau taki.

‘Oku fehu’ia lahi ‘a e nga’unu ko’eni he ‘oku te’eki ke mangalo hifo ‘a e feinga ‘a e Palēmia ‘Akilisi Pohiva ke tuku ‘a Viola Ulakai ki tu’a mei he Komisoni Fakamafolalea ‘a Tonga ‘i he konga kimu’a ‘o e ta’u ni.

‘I he taimi tatau, ‘oku ‘ikai ke mama’o ‘a e nga’unu ko’eni mei hono lolomi ‘a e tau’atāina ‘a e ongoongo ‘i he fonua ni mo hono pule’i faka-polisi ‘o e mītia ‘a e Pule’anga ‘a ia ‘oku ‘ikai koha faka’ilonga lelei ‘eni ki he liliu faka-temokalati.

‘Oku mahu’inga ke tu’u fakataha ‘a e ngaahi kautaha ongoongo ke tau’i ‘a e tau’atāina ‘a e ongoongo mo e hu’unga ‘o e fakamatala ‘i he fonua he ‘oku fu’u mahu’inga fau pea ‘oku lea pe kiai ‘a e Kupu 7 ‘o e Konisitūtone.

‘Oku malava ‘e ke tokolahi ‘o e kakai ‘o e fonua ke faka‘uhinga ‘a e makatu'unga 'o e fokotu’utu’u fo’ou ko’eni pea ‘e ‘ikai ke hala ia ke tau fehu’ia pe ‘oku kei tau’atāina nai ‘a e ongoongo ‘i Tonga ni pe ‘ikai?

Na'e toe fakamahino mei he toko ua ko'eni hange ko hono lipooti 'e he ngaahi kautaha ongoongo 'oku na fakahoko 'a e 'eke fakalao fekau'aki moe me'a ni.