Ta'efiemalie hono hae 'e he Potungaue Leipa ngaahi milemila moli 'i Talamahu ^Featured

Ko ‘Etoni Afu foki ‘oku kau ia he tokotaha pisinisi ‘oku ne hū lahi taha mai ‘a e fua’i’akau hangē ko e ‘apele, moli, pea, kalepi, piisi mo e kalasi kehekehe ‘o e fua’i ‘akau mei Nu’usila ki Tonga ni.

‘Oku ‘ikai foki ke fo’ou ‘a e ta’efiemalie ‘a ‘Etoni ki he founga ‘oku fakahoko ange kiate kinautolu ‘oku nau fakahoko a e pisnisi ko’eni pea ‘oku fa’a ‘oatu pe foki ‘e he ongoongo ni ‘a e hoha’a ko’eni ‘a ‘Etoni ‘a ia ‘oku ne tui ko’ene fakaha hono loto ‘oku ne fakafofonga’i ai ‘a e tokolahi ‘o kinautolu ‘a e kau pisinisi ‘oku nau fakahoko ‘a e ngaahi pisinisi natula tatau mo’eni ka ‘oku ‘ikai kenau si’i lava ‘o lea.

Fakatatau ki he fakamatala ‘a ‘Etoni na’e a’u ange ‘a e kau ngaue ‘a e Potungaue Leipa ‘o hae ‘a ‘enau ngaahi milemila moli kuo ‘osi fa’o ‘o tu’uaki atu ‘i he Maketi Talamahu. pe na’e hoko ‘eni ‘aneafi Monite 13 ‘o Ma’asi pea koe ‘uhinga hono hae tokua ko ‘ene fa’o 4 ka ‘oku fiema’u ke lahi hake ai.

‘I he fakamatala ‘a ‘Etoni na’a ne pehe koe pepa ‘inivoisi na’e ngaue mai ‘aki ‘e he kau ngaue ‘a e Leipa koe pepa ia ‘o e koniteina ia na’a ne ‘omai ki mu’a pea kuo ‘osi ia hono fakatau atu. Ko e pepa ‘o e moli kuo fa’o ‘o fakatau atu lolotonga ‘a ia nae hae ‘e he kau ngaue 'a e Leipa ‘oku kehe hono ‘inivoisi ‘ona pea koe moli ia na’e ‘omai ai koe ‘omai ia mei ‘Amelika ‘o fakafou mai ‘i Nu’usila.

Na’e fakamamafa’i foki ‘e ‘Etoni ‘ene ta’efiemalie mo ‘ene tui fakapapau na’e totonu ke ‘uluaki fetu’utaki mai ‘a e Potungaue Leipa pea nau toki ‘alu ange ‘i he ‘uhinga na’e totonu kenau tomu’a sio ki he pepa he ‘oku kehekehe ‘a e pepa ‘o e koniteina kuo ‘osi hono fakatau atu mo e koniteina fo’ou ‘oku kamata fakatau atu.

‘Oku toe fiemau foki ‘e ‘Etonin kapau ‘e malava ke ‘oange ‘a e lisi ‘o e totongi ‘o e fua’i’akau (price list) mo e kakai ‘oku nau hu mai ki Tonga kae malava ke ma’a ‘a ‘enau ngaue he ‘oku ne tui ‘oku ‘ikai ke tatau hono fakahoko ‘a e lao mo e ngaahi tu’utu’uni kiate kinautolu ‘oku nau fakahoko ‘a e fa’ahinga pisinisi ko’eni.

‘I he fakamatala ‘a ‘Etoni ‘oku ne fakamole ‘a e pa’anga Tonga ‘e $3000-$4000 ‘i he mahina ki hono totongi hono fakamokomoko ‘aisi ‘o e ngaahi koniteina ‘i hono ‘api nofo’anga ‘i Fanga pea koe ngaue faingta’a ‘eni he ka fehalaaki ‘a e fa’ahinga fakamokomoko ‘oku fakahoko ‘e ta’e’aonga katoa ‘a e fua’i’akau ‘i loto he koniteina.

‘Oku fakafuofua ‘a ‘Etoni ki he pa’anga ‘e $24,438.00 ‘a e mahu’inga ‘o e fua’i’akau ‘oku ne uta mai ‘i he’ene koniteina na’e tu’uta fakamuimui mai pea ‘oku ‘ikai lau kiai ‘a e feleti mo e tute. Ko e pa’anga lahi foki ‘eni ‘i he lau ‘a ‘Etoni pea koe ngaue lahi ‘oku fiema’u ke fakahoko ka e lava ke ma’u ‘a e fakamole.

I ha faka’eke’eke ki he Potugaue Leipa na’e fakaha mei ai koe founga anga maheni pe ‘eni ia ‘oku nau fakahoko pea ‘oku pau pe kenau fakahoko hono fua ke mahino ‘oku ma’u ‘a e mamafa totonu fakatatau ki he’enau tu’utu’uni ‘a ia koe kilo ‘e 1.

Na’e toe fakaha foki mei he Potungaue Leipa ‘oku fakahoko ‘eni ia ki ha fa’ahinga koloa pe fakatatau ki he tu’utu’uni ngaue mo e lao pea ‘oku nau ongo’i kapau ‘oku ‘ikai fiemalie ‘a ‘Etoni ki he me’a ni ka ‘oku nau tui pe ‘oku fo’ou kiate ia ‘a e founga ngaue ni.

‘Oku tui pe foki ‘i he taimi tatau ‘a e Potungaue Leipa ia ki he fengaue’aki vaofi mo e kau pisinisi ‘o kau ai ‘a ‘Etoni kae malava ke ma’u ha tupu ‘o e fakamole kuo nau fakahoko. ‘I he taimi tatau ‘oku pau ke mu’omu’a ma’u pe ‘a ‘enau tu’utu’uni ngaue mo e lao. Na'e toe fakamahino mei he Potungaue Leipa 'oku fiema'u kenau fakataha mo 'Etoni ke solova 'ene ta'efiemalie pea 'oku nau tui 'oku 'i ai 'a e ta'efemahino'aki heni.

Kaikehe ‘oku ta’efakafiemalie kia ‘Etoni 'i he'ene fakamatala ‘a ‘enau a’utonu ange ‘o hae ‘a e ngaahi milemila moli he ‘oku sio ‘a e kakai pea ‘oku nau ongo’i ‘oku hange na’a nau fakahoko ha hia.

“‘Oku mole ke mama’o ‘oku fakahoko ‘eni koha launga makatu’unga ‘i ha fa’ahinga loto ka ‘oku ou tui ‘oku totonu kemau fengaue’aki fakataha ke tonu hono fakahoa ‘a e ngaahi pepa pea nau tokoni mai ke lava ma’u ‘emau fakamole he koe feinga ‘oku mau fakahoko pea ‘oku mau fakahoko ia ma’a e kakai ‘o e fonua mo ‘enau fiema’u pea ke ma’u foki ai moha mo’ui homau ngaahi famili", koe aofangatuku mai ia 'a 'Etoni Afu