Ngaue hala ‘aki ‘e he Kovana pa’anga tokoni 'a Ha’apai Featured
Kovana Ha'apai Mo'ale Finau
20 Sepitema, 2017. Kuo fakapapau’i ‘e he lipooti ‘a e ‘Atita Seniale ‘a hono ngauehala’aki ‘e he Kovana Ha’apai Mo’ale Finau ‘a e pa’anga tokoni ki he Vahefonua Ha’apai.
Na’e kole foki ‘e he Sea ‘o e Komiti Fakalakalaka ‘a Ha’apai Lord Tu’iha’angana ki he ‘Eiki Sea ‘o e Fale Alea ‘ke fakahoko hano ‘atita’i ‘a e pa’anga ngaue tokoni ki Ha’apai ‘oku malumalu ‘i he Komiti Fakalakalaka ‘a Ha’apai.
'Oku fakafuofua ki he pa'aanga 'e 150,000 'a e pa'anga tokoni ko'eni pea 'oku fakafou 'eni 'i he patiseti 'a e Potungaue ki he Ngaahi Ngaue Fakalotofonua pea fakataumu'a ki he Komiti Faakalakalaka 'a Ha'apai.
Kuo fakamahino ‘e he ‘Atita ‘i he’ene lipooti na’e ngauehala’aki ‘eni ‘e he Kovana ‘ikai ha fakaongoongo ki he Komiti Fakalakalaka ‘a Ha’apai pe muimui he lao mo e tu’utu’uni ngaue.
'Oku 'ikai foki ke maau mo e ngaahi fakamatala faka-pepa ki hono ngaue'aki 'o e pa'anga ni.
Ko e founga ngaue foki 'eni kuo lahi 'ene hoko ‘i he Pule’anga ‘oku lolotonga le’ole’o ‘i he fonua 'a e ‘ikai muimui ki he lao mo e tu’utu’uni ngaue pea ‘oku makatu'unga ai 'a e lipooti ko'eni 'a e 'Atita.
Na’a tau toki situ’a atu mei hono tu’utu’uni ‘e he Tu’i ‘i hono mafai faka-Konisitutone ke veteki ‘a e Fale Alea ‘o Tonga pea ‘oku ‘ikai mama’o ‘a e ‘uhinga mei he fa’ahinga founga ko’eni.
‘Oku mahino mai ‘oku kau atu ‘a e Kovana Ha’apai ki he teu Fili Fale Alea ‘o e ‘aho 16 Novema 2016 pea ‘oku fehu'ia 'e he ni'ihi ‘a e fekau'aki ‘a e pa’anga tokoni ko’eni mo e kemipeini teu fili Fale Alea 'a e Kovana..
Kuo ma’u foki ‘e he ongoongo ni ‘a e tatau ‘a e lipooti ‘a e ‘Atita pea ‘oku fakaloloma ‘a e malava ke hoko ‘a e fa’ahinga ngaue fakavalevale ko’eni ‘i he levolo faka-taki ‘o hange ko e lipooti ‘a e ‘Atita.
