Fenga’unu’aki ‘a e Kapineti: Fakanofo Minisitā Polisi ‘a Mateni Tapueluelu Featured
Minisitā Polisi Mateni Tapueluelu
6 Ma’asi, 2017. Kuo mahino foki hili ange ‘a e fakataha ‘a e Kapineti ‘i he pongipongi ‘o e ‘aho ni kuo tali lelei ‘i he loto hangamalie ‘e Dr. ‘Aisake Valu Eke ke fakafisi mei he lakanga Minisitā Pa’anga mo e Palani Fakafonua.
‘I he’ene pehe leva kuopau ke fakahoko ‘a e fenga’unu’aki ‘a e Kapineti pea ke fakanofo moha Minisitā fo’ou kene fetongi ‘a Dr. Eke. Kuo fakanofo ai ‘e he Palemia ‘a Mateni Tapueluelu Fakafofonga ‘o Tongatapu 4 kene hoko ki he lakanga koe Minisitā Polisi ‘o fetongi ‘a Pohiva Tui’onetoa.
‘E nofo leva ‘a Tu’i’onetoa ia ki he Potungāue Leipa pea tanaki atu kiai mo e Potungāue Pa’anga Hu Mai kae fetongi ‘e Tevita Lavemaau ‘a Dr. Eke ‘i he lakanga Minisitā Pa’anga mo e Palani Fakafonua.
Ko Mateni Tapueluelu leva ‘oku hū foou hake ki he Kapineti. 'Oku toe mahino foki mei fenga'unu'aki ko'eni kuo to'o mo e Potungāue Pilisone ia 'o 'ave ki he malumalu 'o e Potungāue Lao.
Ko Tapueluelu foki koe memipa foki ia ‘o e Paati ‘Otumotu Anga’ofa pea ‘oku mali mo e taha ‘o e ngaahi ‘ofefine ‘o e Palēmia. Na’a ne hoko koe ‘Etita ‘o e Nusipepa Kele’a he ngaahi ta’u lahi kimu’a pea ne hoko ko e Fakafofonga Fale Alea ‘o e Vahenga Tongatapu 4.
‘Oku malie ‘a e fenga’unu’aki ko’eni ‘a e Kapineti pea na’e ‘i ai foki mo e ngaahi fai fika ‘a e ni’ihi ‘i he paloti ke fakamalōlō’i ‘a e Palēmia ‘e foaki ange hanau lakanga ka ‘oku mahino mai ‘oku ‘ikai hoko ‘o hange ko ia ‘oku hoko he ‘aho ni.
